મહેસાણા જિલ્લાનું મહા અધિવેશન વિસનગરમાં યોજાયું
સાકળચંદ યુનિવર્સિટીમાં પત્રકાર એકતા જિંદાબાદના નારા ગુંજ્યા : પત્રકારોના પ્રશ્નો મુદ્દે અવાજ બુલંદ કરાયો
• પત્રકાર એકતા પરિષદના અધ્યક્ષ લાભુભાઈ કાત્રોડીયાની ઉપસ્થિતિમાં મહેસાણા જિલ્લાના પત્રકારો સંગઠિત થયા
• મહેસાણા જિલ્લા પત્રકાર એકતા પરિષદના અધ્યક્ષ અર્જુનજી ઠાકોરની આગેવાનીમાં કાર્યક્રમ યોજાયો
• સાકળચંદ યુનિવર્સિટીના ચેરમેન પ્રકાશ પટેલ, લોકસભા સાંસદ હરી પટેલ તેમજ પત્રકાર સંગઠનના હોદ્દેદારો સહિત રાજ્ય પરના પત્રકારો ઉપસ્થિત રહ્યા
અપના મિજાજ ન્યુઝ (સંજય જાની)
ગુજરાત પત્રકાર એકતા પરિષદના નેજા હેઠળ શનિવારે મહેસાણા જિલ્લાના વિસનગર સ્થિત સાકળચંદ યુનિવર્સિટીમાં પત્રકારોનું અધિવેશન યોજાયું હતું. સંગઠનના મુખ્ય અધ્યક્ષ લાભુભાઈ કાત્રોડીયાની ઉપસ્થિતિમાં મહેસાણા જિલ્લા સંગઠનના પ્રમુખ અર્જુનજી ઠાકોરની આગેવાનીમાં આયોજિત અધિવેશનમાં ગુજરાત ભરના પત્રકારોએ ભાગ લીધો હતો. કાર્યક્રમમાં પત્રકારોને કનડતા પ્રશ્નો અંગે ચર્ચા કરવામાં આવી હતી. જેમાં પત્રકારોના આરોગ્ય, રક્ષણ સહિતના મુદ્દે અવાજ બુલંદ કરાયો હતો.
રાજ્યના પત્રકારોના હિતાર્થે ચાર વ્યક્તિઓએ whatsapp ગ્રુપ દ્વારા ચર્ચા કરીને પત્રકારોને સમાચાર સંપાદન માટે પડતી તકલીફો સહિતની અનેક સમસ્યાઓના ઉકેલ માટે કંઈક કરી છૂટવાની ભાવના સેવામાં આવી હતી. જે બાદ એક પછી એક પત્રકારોને સંગઠિત કરવામાં આવ્યા હતા. સંગઠિત થયેલા પત્રકારોએ પ્રથમ બેઠક યોજ્યા બાદ રાજ્યભરના જિલ્લા અને તાલુકા મથકોમાં એક સંદેશો વહેતો કર્યો હતો. જેના ફળ સ્વરૂપે સર્વ સંમતિથી લાભુભાઈ કાત્રોડિયાને સંગઠનના સુકાની તરીકે પસંદ કરી ‘ગુજરાત પત્રકાર એકતા પરિષદ’સંગઠનની સ્થાપના કરવામાં આવી છે. સંગઠનના અધ્યક્ષ દ્વારા રાજ્યભરના પત્રકારોને એક તાંતણે બાંધીને નિસ્વાર્થ ભાવે તેઓને કન્નડતા પ્રશ્નો તેમજ સમાચાર સંપાદન માટે પડતી હાલાકી સહિતની સમસ્યાઓની છણાવટ કરીને આ અંગે રાજ્ય સરકાર સમક્ષ મૂકવામાં આવી છે. સંગઠિત પત્રકારોના મોટાભાગના પ્રશ્નો સરકાર દ્વારા હલ કરવામાં આવ્યા છે. જે નથી થયા તેના માટે સંગઠનના હોદ્દેદારો લડત આપી રાજ્યના પત્રકારો સંગઠિત અને સુરક્ષિત રહે તેવા પ્રયાસો હાથ ધરાયા છે.
રાજ્યમાં સંગઠનનું 44મુ અધિવેશન વિસનગર ની સાકળચંદ યુનિવર્સિટીમાં શનિવારે યોજવામાં આવ્યું હતું. જેમાં યુનિવર્સિટીના ચેરમેન પ્રકાશભાઈ પટેલે પત્રકારોને જોઈતી તમામ સુવિધાઓ પૂરી પાડી હતી. ઉપરાંત તેઓએ યુનિવર્સિટી દ્વારા સંચાલિત આરોગ્ય સેવાની જરૂરિયાત રહે તેવા સંજોગમાં નિઃશુલ્ક રીતે મદદરૂપ બનવા વચન આપ્યું હતું. સમારંભની શરૂઆત આવકાર, દીપ પ્રાગટ્ય અને રાષ્ટ્રગાન સાથે કરવામાં આવી હતી. સમારંભમાં ઉપસ્થિત મહાનુભાવો તેમજ સ્થાનિક અને રાજ્યભરમાંથી આવેલા સંગઠનની વિચારધારાથી ભરેલા પત્રકારોના સત્કાર-સન્માન કરવામાં આવ્યા હતા. મહેસાણાથી ખાસ ઉપસ્થિત રહેલા લોકસભા સાંસદ હરિભાઈ પટેલે પ્રાસંગિક પ્રવચન આપી પત્રકાર ધર્મ અને પત્રકારો જે પરિસ્થિતિમાં કામ કરે છે તેનો ચિતાર આપ્યો હતો. સંગઠનના અધ્યક્ષ લાભુ દાદાએ પત્રકારોના હિતાર્થે કરવી પડતી તમામ કાર્યવાહી કરવાનો કોલ આપી સંગઠનને મજબૂત બનાવવા માટે હાકલ કરી હતી.
