Apna Mijaj News
Breaking Newsજનતાનો અવાજ

મહેસાણા સિવિલ ભલે નવી બને પણ ખખડી ગયેલો સ્ટાફ પણ બદલાવ જો…

•”અપના મિજાજ”ના અહેવાલની અસર, આરોગ્ય મંત્રીએ નવી હોસ્પિ.ની જાહેરાત કરી

રૂ.૧.૭૯ કરોડના ખર્ચે જિલ્લાની જનરલ હોસ્પિટલ નવી બનાવવામાં આવશે

•નાણાં ફાળવી દેવામાં આવ્યા, સિવિલ સુપ્રિટેન્ડેન્ટ રજા માણીને આવે પછી આયોજન

સંજય જાની (અપના મિજાજ)

     મહેસાણા જિલ્લાની ગરીબ અને મધ્યમ વર્ગની પ્રજાને આરોગ્ય સેવા પૂરી પાડતી એકમાત્ર જનરલ હોસ્પિટલ સંચાલકોની બેદરકારી અને સમયનો માર ખાતી પોતાનું “નૂર” ગુમાવી ચૂકી છે. સિવિલ હોસ્પિટલને તેના મૂળ રંગરૂપમાં જ નહીં પરંતુ એથી પણ અતિ સુંદર, સુશોભિતઅને સુવિધાથી સજ્જ કરવા માટે અહીંના યુવા કોંગ્રેસ કાર્યકરોની ટીમ મેદાનમાં આવી હતી. જેને સમાચાર માધ્યમોએ પીઠબળ પૂરું પાડ્યું. પરંતુ માધ્યમોના સચોટ અહેવાલથી હાઈ બ્લડ પ્રેશરમાં આવી ગયેલા અહીંના સિવિલ સુપ્રિટેન્ડેન્ટ માનસિક સમતુલા ગુમાવી બેઠા,ને માધ્યમોને દબાવવા સિવિલ હોસ્પિટલની લાલિયાવાડી જાહેર ન થઈ જાય તે માટે વિડિયો -ફોટોગ્રાફી, મીડિયા કવરેજ ગેરકાનૂની છે તેવું લખેલા બેનરો છપાવી, હોસ્પિટલની દીવાલોમાં ચિપકાવી મિડિયા કવરેજની મનાઈ ફરમાવી દીધી. પરંતુ માધ્યમોએ તઘલખી નિર્ણય સામે “અપના મિજાજ” દેખાડતા આખરે, સૂંઠના ગાંગડે ‘ગાંધી’ થવા નીકળેલા સત્તાંધ અધિકારીઓને માટે તો ધરતી માર્ગ આપે તો સમાઈ જવા જેવો ઘાટ ઘડાયો અને જિલ્લા કલેક્ટરે તેમનો ઉધડો લઇ નાંખતા ગણતરીના સમયમાં જ હોસ્પિટલમાં ઠેરઠેર લગાવેલા બેનરો ઉતારી દેવા પડ્યા. જે બાદ રાજ્યના આરોગ્ય મંત્રીએ સિવિલ હોસ્પિટલ રૂ.૧.૭૯ કરોડના ખર્ચે નવી બનાવવામાં આવશે તેવી જાહેરાત કરવામાં આવી છે. પરંતુ મહેસાણાની જનતા ઈચ્છે છે કે નવી હોસ્પિટલ તો ભલે બનાવો પણ અહીં વર્ષોથી ચીપકીને બેઠેલા અને મનસ્વી વર્તન કરતાં ખખડી ગયેલા સ્ટાફને પણ ખદેડી દઈને દર્દીઓ સાથે નમ્રતા ભાવ સભર વર્તન કરતો નવો સ્ટાફ પણ મૂકવો જોઈએ.

 

        મહેસાણાની સિવિલ હોસ્પિટલમાં કાર્યરત આર.એમ.ઓ. સહિતના લોકો (ર) મેશ જેવા કાળા કામ કરતા હોય તેવું તેમના વર્તન ઉપરથી લાગી રહ્યું છે. શહેર યુવા કોંગ્રેસની ટીમે ખખડી ગયેલી હોસ્પિટલ, ગંદકી તેમજ પુરતી આરોગ્ય સેવાનો અભાવ હોવાના ફોટોગ્રાફ્સ જાહેર કર્યા હતાં. જે બાદ હોસ્પિટલના સત્તાધીશોએ નીતિ નિયમોને નેવે મૂકી મનસ્વી રીતે હોસ્પિટલમાં ફોટો- વિડીયોગ્રાફી અને મિડિયા કવરેજની મનાઈ ફરમાવી એક રીતે જોઈએ તો આરોગ્ય મંત્રીનું “નાક” વાઢવાની તૈયારી કરી લીધી હતી. પરંતુ જિલ્લા કલેક્ટરને આ બાબતની જાણ થતા તેઓએ તાત્કાલિક હોસ્પિટલ સત્તાધીશોના આ નિર્ણયને જૂઠો ઠેરવીને મનાઈ ફરમાવતા બેનરો હોસ્પિટલમાંથી હટાવરાવી લીધા હતા. જે બાદ ગણતરીના સમયમાં જ આરોગ્ય મંત્રીએ મહેસાણાની સિવિલ હોસ્પિટલ કરોડો રૂપિયાના ખર્ચે નવી બનાવવામાં આવશે તેવી જાહેરાત કરી છે. આ બાબતે હોસ્પિટલના સૂત્રોએ જણાવ્યું હતું કે નવી હોસ્પિટલ બનાવવા માટે રકમ આવી ગઈ છે. જે રકમમાંથી સાત માળની અદ્યતન હોસ્પિટલ બનાવવામાં આવશે. નવી હોસ્પિટલ નું કામ ચાલુ રહે ત્યાં સુધી સિવિલ હોસ્પિટલને કામચલાઉ રીતે કોઈ અન્ય જગ્યાએ ખસેડવા માટે આયોજન કરવામાં આવ્યું છે. પરંતુ કામચલાઉ રીતે હોસ્પિટલ ક્યાં ખસેડવી તેનો નિર્ણય સિવિલ સુપ્રિટેન્ડેન્ટ કરશે પરંતુ હાલ તેઓ રજા ઉપર ગયા છે એટલે એમના આવી ગયા પછી જ યોગ્ય નિર્ણય કરવામાં આવશે.

  # “અપના મિજાજ” આગામી અંકમાં #

# મહેસાણા સિવિલ હોસ્પિ.નું વર્ષ 2001નું ધાબળા કૌભાંડ કોણે આચર્યું? શું આપ જાણો છો?

#સિવિલ હોસ્પિટલ સંકુલમાં આવેલા રહેણાંક ક્વાર્ટર હકદારોને નહીં પરંતુ હંગામી કામદારોને લાગવગશાહીથી આપી દેવાયા?!

# (ર) મેશ જેવા કાળા કામોનો ટૂંક  સમયમાં પર્દાફાસ….

Related posts

બીજા લગ્ન કરવા બાળકી નડતરરૂપ બનતાં ઉનાવામાં તરછોડી દીધી’તી

ApnaMijaj

બ્રાઝિલમાં વિરોધ પ્રદર્શન પર પીએમ મોદી ચિંતિત, કહ્યું- લોકતાંત્રિક પરંપરાઓનું સન્માન કરો

Admin

સ્ટેટ મોનિટરિંગ સેલે ‘કાળો માલ’ પકડ્યો !

ApnaMijaj

Leave a Comment

error: Content is protected !!