મહેસાણામાં કથીત પત્રકારોએ વેપારીને દબાવ્યો
•હૈદરી ચોકમાં ધાકધમકી, લુખ્ખાગીરી અને ગાડી ચઢાવવાનો પ્રયાસ
•’પત્રકાર’નો નકાબ પહેરી ખંડણીનો પ્રયત્ન કરવામાં આવ્યો હોવાની ચર્ચા
•કરિયાણાની દુકાને ઘૂસીને યુવક અને યુવતીઓએ ગેરકાયદેસર રીતે જીએસટી નંબર માગ્યો
અપના મિજાજ ન્યુઝ (સંજય જાની)
મહેસાણા શહેરના હૈદરી ચોક વિસ્તારમાં આવેલ એક કરિયાણાની દુકાને તા. ૧૬ મે શુક્રવારના સાંજે છ વાગ્યાના અરસામાં ચાર યુવતીઓ અને એક યુવક જેઓ પોતાને પત્રકાર હોવાનું કહી અચાનક ઘૂસી ગયા અને દુકાન સંચાલકને ગેરકાયદેસર રીતે ડરાવતાં ધમકાવતાં પૂછ્યું કે “તમારો જીએસટી નંબર કયા છે?” આવી રીતે દુકાનદારને દબાણમાં લેવાના પ્રયાસ કર્યો હતો. જો કે, આ ઘટનાને જોઈને ત્યાં હાજર સ્થાનિક યુવા પત્રકારે હિંમતભેર પૂછ્યું કે, “તમે કોણ છો? અને ક્યાંના પત્રકાર છો?” આ પ્રશ્નનો યોગ્ય જવાબ આપવાના બદલે કથિત પત્રકાર યુવક અને યુવતીઓ ઉશ્કેરાયા અને બોલાચાલી કરી હોવાનું સામે આવ્યું છે. ત્યારબાદ તેઓએ દુકાનના બહાર રાખેલી પોતે લાવેલી ‘શિફ્ટ’ ગાડીમાં સવાર થઈને ભાગવાનો પ્રયાસ કર્યા સાથે પત્રકારને કચડી નાખવાના ઇરાદે તેમના પર ગાડી ચડાવી દીધી હતી. જેના પરિણામે પત્રકારના પગમાં અસ્થીભંગ જેવી ગંભીર ઈજા પહોંચી હોવાનું સામે આવ્યું છે.
આ ઘટનાની માહિતી તાત્કાલિક મહેસાણા શહેર એ ડિવિઝન પોલીસને આપવામાં આવી હોવા છતાં પોલીસ મથકે ફક્ત એક અરજી લઇને મામલો ઠંડો પાડવાનો પ્રયાસ કરાયો હોવાની ચર્ચા થઈ રહી છે. આ ઘટનાએ અનેક સવાલો ઉભા કર્યા છે. શું ખરેખર આ યુવક અને યુવતીઓ પત્રકાર છે?જો છે તો કઈ મીડિયા સંસ્થા સાથે જોડાયેલા છે? તેમણે કઈ અધિકૃતતા હેઠળ વેપારી પાસેથી જીએસટી અંગે માહિતી માંગી? એક પત્રકાર તરીકે ઓળખ આપીને તેઓએ લોકશાહીના ચોથાસ્તંભની શ્રેષ્ઠ પરંપરાને કેમ લજવવા પ્રયાસ કર્યો? આ તમામ પ્રશ્નો મહેસાણા શહેર તેમજ જિલ્લામાં ખરા અર્થમાં અખબારી તેમજ ઇલેક્ટ્રોનિક મીડિયા સંસ્થાન સાથે સંકળાયેલા પત્રકારોના જનમાનસ પર ઉભરી આવેલો દેખાઈ રહ્યો છે. મહત્વની બાબત એ છે કે મહેસાણાથી છેક 80 km દૂર આવેલાં અમદાવાદમાંથી આવીને તેમણે એક દુકાનદારને ધમકાવવાનો પ્રયાસ કેમ કર્યો?, કોના ઇશારે કર્યો? જીએસટી નંબર માગવાનો હેતુ શું હતો? આ તમામ પ્રશ્નોના જવાબ પોલીસે તેમની પાસેથી ઓકાવવા જોઈએ. તેવી માગણી પણ સંનિષ્ઠ પત્રકારોમાંથી ઉઠી રહી છે.
• પોલીસ તંત્ર આવા ‘નકલી પત્રકારો’ના નાટકને ઓળખે
આ ઘટના એ સાબિત કરે છે કે કઇ રીતે કેટલાક અસામાજિક તત્વો પત્રકારના નકાબ પાછળ છુપાઈને ખંડણી અને ધાકધમકીના કાર્યોને અંજામ આપી રહ્યા છે. આવી ઘટનાઓ ખરેખર સારા અને સાચા પત્રકારોને શરમજનક સ્થિતીમાં મૂકે છે અને પત્રકારિતાની વિશ્વસનીયતાને આંચ આપે છે. અત્યાર સુધી પોલીસે કોઈ કડક પગલા લીધા નથી અને સામાન્ય અરજી કાગળ લઈને મુદ્દાને ઓગાળી નાખ્યો છે. પરંતુ હવે સમય આવી ગયો છે કે પોલીસ તંત્ર આવા ‘નકલી પત્રકારો’ના નાટકને ઓળખી કાયદેસરની અને ઉદાહરણરૂપ કાર્યવાહી કરે.
• પત્રકાર ના બદલે પોલીસને કચડવા પ્રયાસ કર્યો હોત તો?
મહેસાણા શહેરમાં બનેલી ઘટનામાં કહેવાતી પત્રકાર ટોળકીએ અહીંના સ્થાનિક યુવા પત્રકાર ઉપર કાર ચડાવીને તેને કચડવા માટે પ્રયાસ કર્યો. જેમાં પત્રકારને પગના ભાગે ગંભીર ઈજા પહોંચી છે. ત્યારે પ્રશ્ન એ થાય છે કે આવા કિસ્સામાં જો કોઈ પોલીસ કર્મચારી કે અધિકારી ઉપર કાર ચડાવીને તેમને કચડવા પ્રયાસ કર્યો હોત તો શું એ ડિવિઝન પોલીસ મથકના પીઆઇ અને જિલ્લા પોલીસ અધિક્ષક ખાલી અરજી લઈને કામ ચલાવી લેતા? કે પછી ઘાતક દુઃસાહસ કરનાર તત્વોના ટાંટિયા ભાંગી નાખત?! આ પ્રશ્નનો જવાબ સરળ છે અને સ્પષ્ટ છે તો પછી પોલીસ તેની ભૂમિકામાંથી કેમ બહાર જતી રહી તે સમજણથી પરે છે.
• લોકો અને વેપારીઓએ લુખ્ખાઓને ઓળખી લેવા પડશે
મહેસાણામાં વેપારીની સાથે બનેલી ઘટનાને જોતા હવે એ સમય આવી ગયો છે કે, પ્રજાએ તેમજ વ્યવસાયિક સંસ્થાના સંચાલકોએ પણ હવે સચેત રહેવું પડશે અને કોઇ પણ શંકાસ્પદ વ્યક્તિ પોતે પત્રકાર હોવાનું કહે તો તેનું પ્રમાણપત્ર, ઓળખ અને ઓળખતી સંસ્થાની પુષ્ટિ કરવાની માંગ કરવી જોઈએ. ઉપરાંત જો તેમને કંઈ શંકાસ્પદ લાગે તો જે તે પોલીસ મથકનો સંપર્ક સાધી જરૂર જણાય તો કાનૂની કાર્યવાહી કરીને લુખ્ખા તત્વોને સબક શીખવાડવો જ પડશે.
• મહિલાઓને પત્રકારના ઓળખકાર્ડ આપીને ઘટનાને અંજામ અપાતો હોવાની ચર્ચા
રાજ્યમાં અમુક સમાચાર પત્રોના તંત્રી- માલિકો અને યુટ્યુબ ચેનલ ચલાવતા લોકોએ રિપોર્ટરના કાર્ડ અમુક લોકોને બનાવી આપીને રીતસરનો તોડબાજીનો ધંધો આદર્યો છે. જેમાં અમુક લુખ્ખા તત્વો તો આવી યુવતીઓ અને મહિલાઓને તેમાં ભાગીદાર બનાવીને તેમને રિપોર્ટરના ઓળખકાર્ડ બનાવી આપી તોડબાજીની ઘટનામાં સાથે રાખતા હોય છે. જેનો મુખ્ય ઉદ્દેશ એવો હોય છે કે જો કોઈ વ્યવસાયિક સંસ્થાનો સંચાલક સામો થાય કે પોલીસ બોલાવે તો તેની સામે કથિત પત્રકાર મહિલાને ધરી દઈને કાનૂની કાર્યવાહીમાં મજબૂતાઈ રાખી શકાય.
• મહેસાણામાં પણ કથિત મહિલા પત્રકારોનો રાફડો ફાટ્યો
મહેસાણાની ઘટનામાં પણ કંઈક આવું જ બન્યું છે જેમાં દુકાનદાર પાસે પહોંચેલી એક કથિત પત્રકાર યુવતી બબાલ પછી સિવિલ હોસ્પિટલમાં સારવારમાં દાખલ થઈ પોતાનો અને પોતાની ટીમનો કાનૂની રીતે બચાવ કરવા નાટક પર ઉતરી આવી છે. અત્રે નોંધનીય છે કે મહેસાણામાં પણ પત્રકારોના નામે અનેક મહિલાઓ મેદાનમાં ઉતરી છે. જિલ્લા પોલીસ અધિક્ષક દ્વારા તેમની મહત્વની શાખા ગણાતી એસઓજી અને એલસીબીની ટીમને મેદાનમાં ઉતારીને મહેસાણામાં કાર્યરત અમુક મહિલા અને પુરુષ પત્રકારોના ડેટા કઢાવે તો દૂધનું દૂધ અને પાણીનું પાણી થઈ જાય તેમ છે. એટલું જ નહીં પોતાને પત્રકાર તરીકે ઓળખાવતા અમુક મહિલા અને પુરુષ પત્રકારોની સામે અનુભવી પત્રકારોને બેસાડીને સમાચાર લખાણ કરાવરાવે અથવા તો કોઈ એક બે સ્ક્રીપ્ટ લખવડાવે તો પણ ખબર પડી જાય કે સત્ય હકીકત શું છે.
