મહેસાણાના ટીબી રોડ વિસ્તારમાં આવેલા નીલકંઠ મહાદેવ મંદિર પટાંગણમાં ઓમ નમઃ શિવાયના નાદ ગુંજી ઉઠ્યા
• પવિત્ર શ્રાવણ માસની પૂર્ણાહુતિ પ્રસંગે સનાતની શિવભક્તો ભોળાનાથમાં લીન થઈ ગયા
• ભક્તજનોએ ભક્તિ ભાવથી આત્મા તૃપ્તિ અને ભોજન પ્રસાદથી જઠરાગ્નિ ઠાર્યો
મહેસાણા: (અપના મિજાજ ન્યુઝ-પ્રશાંત સોની)
પવિત્ર શ્રાવણ માસ દરમિયાન સનાતની ભક્તોએ ભગવાન ભોળાનાથની આરાધના, ક્યાંક આકરી તપસ્યા, અભિષેક, ભજન કીર્તન તેમજ ઉપવાસ આદિ ભક્તિ કાર્ય આદર્યા હતા. આજે અમાસે ઠેર ઠેર શિવભક્તોએ શિવ મહિમા ગાઈને ભક્તિ ભાવથી શ્રાવણ માસની પૂર્ણાહુતિ કરી હતી.
મહેસાણા શહેર તેમજ જિલ્લાભરમાં શિવભક્તોએ આસ્થાભેર પવિત્ર શ્રાવણ માસના અંતિમ દિવસ અમાસે ઉજવણી કરી હતી. જેમાં મહેસાણા શહેરમાં ટીબી રોડ પરના પવનસુત ચોક સ્થિત શ્રી નીલકંઠ મહાદેવ મંદિરે પણ આસપાસની સોસાયટીના રહીશોએ શ્રદ્ધાપૂર્વક ભગવાન ભોળાનાથને ભજીને પુણ્યનું ભાથું બાંધ્યું હતું. નિજ મંદિરમાં બિરાજમાન શ્રી નીલકંઠ મહાદેવને જળાભિષેક તેમજ દુધાભિષેક દ્વારા ઔદિચ્ય સહસ્ત્ર બ્રાહ્મણોના કંઠેથી રેલાયેલા કર્ણપ્રિય શ્લોકોના સથવારે હવન, પૂજા, આરતી થકી ભક્તજનો દેવાધિદેવ મહાદેવની આરાધના કરી હતી.
ટીબી રોડ વિસ્તારમાં આવેલી ગીતા પાર્ક, સિદ્ધાર્થ, સુખેશ્વર, સમર્પણ સહિતની અનેક સોસાયટીના રહીશોએ ધર્મ ભક્તિના મહાસાગરમાં પુણ્યભાવની ડૂબકી લગાવી હતી. પવિત્ર શ્રાવણ માસની પૂર્ણાહુતિ અંગે આયોજિત કાર્યક્રમમાં પ્રકાશ ભાવસાર, શૈલેષ સોની, આનંદ ઠાકર સહિતના લોકોએ સહકાર આપ્યો હતો. જ્યારે હવન યજ્ઞ માટે ગણપતભાઈ પટેલ, ભુપેન્દ્રભાઈ પટેલ, પ્રેમજીભાઈ ભાનુશાળી, સુનિલભાઈ પંચાલ, સંજયભાઈ યાજ્ઞિક સહિતના ભક્તજનો યજમાન પદે બિરાજમાન થઈ શિવ મગ્ન બન્યા હતાં. યજ્ઞ હવનની પૂર્ણાહુતિ બાદ સૌ ભક્તજનોએ સમૂહ ભોજન પ્રસાદ લઈ ધન્યતા અનુભવી હતી.
