પ્રમુખ પદ માટે અટકળો, ઉપ-પ્રમુખનું પદ વોર્ડ નં.પાંચના નગરસેવિકા જલ્પાબેન વ્યાસને અપાય તેવી સંભાવના
કલોલ પાલિકામાં પ્રમુખ બનવા પુરુષ સભ્યોના ધમ પછાડા: ઉપપ્રમુખ પદ વિપ્ર મહિલા નગરસેવિકાને મળે તેવી વકી
•પાલિકાના વોર્ડ નં.૦૧,૦૩,૦૭,૦૮,૦૯ અને ૧૦ના નગરસેવકો પ્રમુખ પદની ખુરશી હસ્તગત કરવા તૈયારીમાં લાગ્યાં
• પ્રમુખ પદ મેળવવા માટે મુખ્યત્વે ચાર પાટીદાર નગરસેવકો હીટ લિસ્ટમાં પરંતુ ભાજપની આશ્ચર્ય જગાડતી નીતિ કામ કરી જશે?
કલોલ: અપના મિજાજ ન્યુઝ
ગાંધીનગર જિલ્લાના મહત્વના ગણાતા કલોલ શહેરની સુધરાઈના પ્રમુખ પદે બિરાજમાન શ્રીમતી ઉર્વશીબેન મુકેશભાઈ પટેલનો શાસનકાળ આગામી તા. 16 સપ્ટેમ્બરના પૂર્ણ થવા જઈ રહ્યો છે ત્યારે શહેર સુધરાઈની ગાદી હસ્તગત કરવા માટે હવે અનેક નગરસેવકો કુદા કૂદ કરવા લાગ્યા હોવાની ચર્ચા શહેરભરમાં જોર પકડી રહી છે. અઢી વર્ષ પૂર્વે યોજાયેલી નગરપાલિકાની ચૂંટણીમાં કલોલ શહેરની જનતાએ નગરના 11 વોર્ડમાં જંગી મતદાન કરીને ભારતીય જનતા પાર્ટીને 33 સભ્યોની ભેટ આપીને પાલિકામાં સત્તાનું સુકાન સંભાળવા મદદ કરી હતી. કલોલ પાલિકામાં મહિલા અનામતની જોગવાઈ પ્રમાણે શહેરના શિક્ષિત અને નાડી પારખું મહિલા ઉર્વશીબેન પટેલને પ્રમુખ પદનો મહત્વનો હોદ્દો ભારતીય જનતા પાર્ટી તરફથી આપવામાં આવ્યો છે. જે પ્રમુખ પદની અવધિ હવે ગણતરીના દિવસોમાં જ પૂર્ણ થવા જઈ રહી છે. જેથી કલોલ પાલિકામાં આગામી દિવસોમાં નવા પ્રમુખ કોણ હશે તે અંગે અનેક તર્ક વિતર્ક વહેતા થયા છે. બીજી તરફ ઉપપ્રમુખનું પદ વોર્ડ નં.પાંચના નગરસેવિકા જલ્પાબેન વ્યાસને અપાય તેવી પણ સંભાવના જાણકારો વ્યક્ત કરી રહ્યા છે. જોકે આ તમામ સંભવ -અસંભવ વાતો વચ્ચે પ્રદેશ કાર્યાલય કમલમમાં જેના સંબંધો સારા હશે અથવા તો જેની પણ લાગવગ મજબૂત હશે તેને જ પ્રમુખ અને ઉપપ્રમુખના હોદ્દાની ભેટ નસીબ થશે.
કલોલ નગરપાલિકા વિસ્તારમાં આવેલા કુલ 11 વોર્ડમાં અઢી વર્ષ પૂર્વે યોજાયેલી ચૂંટણીમાં એક વોર્ડ દીઠ ચાર ઉમેદવારોની પસંદગીમાં 44 નગર સેવકો ચૂંટાઈ આવ્યા હતા. જેમાં વોર્ડ નં.બેમાં ચાર કોંગ્રેસ, વોર્ડ નં.૦૬માં ચાર કોંગ્રેસ, વોર્ડ નં.૧૧ માં બે કોંગ્રેસ અને એક અપક્ષ મળીને કુલ 11 સભ્યો વિપક્ષમાં બેઠા હતા. જ્યારે બાકીના વોર્ડમાં ભાજપના સભ્યો ચૂંટતા હતા તેમનું સંખ્યાબળ 33 સાથે ઉર્વશીબેન મુકેશકુમાર પટેલે પાલિકામાં સત્તાનું સુકાન સંભાળ્યું હતું. જોકે હવે તેમના પ્રમુખ પદની અવધી પૂર્ણ થતા આગામી પ્રમુખ બનવા માટે પુરુષ નગર સેવકોમાંથી મુખ્યત્વે ચાર પાટીદાર સભ્યો મેદાનમાં હોવાની ચર્ચાએ જોર પકડ્યું છે. પરંતુ રાજકીય વર્તુળોમાં ભાજપના 33 સભ્યોમાંથી હવે આગામી પ્રમુખ કોણ હશે? તેવી અટકળો શહેરમાં ચોરેને ચૌટે સાંભળવા મળી રહી છે. એટલું જ નહીં રાજકીય રસિયાઓ પોતપોતાના મત રજૂ કરીને ફલાણી વ્યક્તિ જ પ્રમુખ બનશે તેવો દ્રઢ દાવો કરતાં પણ જોવા મળી રહ્યા છે. રાજકીય રસિયાઓની અટકળો વચ્ચે એક હવા એવી પણ ચાલી રહી છે કે પાલિકાનું પ્રમુખ પદ પુરુષ નગરસેવકને મળે તો ઉપ-પ્રમુખની ખુરશી રેલવે પૂર્વના વોર્ડ નંબર પાંચના નગરસેવિકા જલ્પાબેન ધર્મેન્દ્રકુમાર વ્યાસ કે જેવો વર્તમાન સમયમાં લીગલ સમિતિના ચેર પર્સન છે. સંભવત તેઓના ફાળે આવી શકે તેમ છે.
• પાલિકાના આટલા વોર્ડમાંથી સંભવત આ લોકો પ્રમુખ પદના દાવેદાર માનવામાં આવી રહ્યા છે
કલોલ પાલિકાના નવા પ્રમુખ માટે વોર્ડ નં.૦૧માંથી શૈલેષ પટેલ, શૈલેન્દ્રસિંહ વાઘેલા, વોર્ડ નં.૦૩ માંથી જીતુ પટેલ, વોર્ડ નં.૦૭ કેતન શેઠ, વોર્ડ નં.૦૮ ચેતન પટેલ, વોર્ડ નં.૦૯, ભુપેન્દ્ર પટેલ, દિનેશ પટેલ અને વોર્ડ નં.૧૦ માંથી મનુભાઈ ચૌધરી તેમજ પ્રકાશ વળગળેને દાવેદાર માનવામાં આવી રહ્યા છે. જોકે આમાં વોર્ડ નં. નવના નગર સેવક ભૂપેન્દ્ર પટેલ કારોબારી ચેરમેન તરીકે નિયુક્ત કરાયેલા છે. જે તમામ બાબતો જોતા જો પુરુષ સભ્ય પ્રમુખ બને તો ઉપપ્રમુખ તરીકે મહિલા સભ્યને પસંદ કરવામાં આવશે તેવી જાણકારી રાજકીય તજજ્ઞોએ વહેતી કરી છે.
• ભાજપ દ્વારા આશ્ચર્યચકિત થઈ જવાય તેવા અનેક પાસા અંતિમ સમયમાં ફેંકવામાં આવ્યા છે,અહીં પણ કંઈક નવું થઈ શકે તો નવાઈ નહીં
કલોલ પાલિકાના નવીન પ્રમુખ બનવા માટે ભલે કેટલાય નગર સેવકો પોતાના નેતાઓના શરણે ગયા હોઈ શકે, ભલે તેઓએ હવે રાત દિવસ ઉજાગરા કરીને બેઠકોનો દૌર શરૂ કરી દીધો હશે. પરંતુ જાણકાર સૂત્રો એમ પણ કહે છે કે ભારતીય જનતા પાર્ટી રાજનીતિ કરવામાં માહેર છે. જેમ ગત વિધાનસભા ચૂંટણીમાં ભાજપના ઉમેદવાર જાહેર કરવામાં કલોલ શહેર જ નહીં પરંતુ તાલુકા ભરમાં કોઈએ કલ્પના નહીં કરી હોય તેવું નામ સામે લાવી દઈ લોકોને આશ્ચર્યચકિત કરી દીધા તેમ સંભવત કલોલ પાલિકાના નવા પ્રમુખ પદે આગામી દિવસોમાં પુરુષ સભ્ય ન પણ હોય અને ફરી એક વખત મહિલા સભ્યને જ પ્રમુખ તરીકે અત્યારે ‘ગોપનીય’ રહેલું નામ જાહેર કરી દેવાય તો ‘નવીન’ પામવા જેવું બની શકે.
• પાટીદાર સભ્યોના પ્રભુત્વમાં પ્રમુખ પદ પુરુષ સભ્યને અપાય તો સંભવત રેલવે પૂર્વમાંથી મહિલા ઉપપ્રમુખ હોઈ શકે
કલોલ પાલિકા વિસ્તારમાં પાટીદાર મતદારો અને પાલિકામાં ચૂંટાઈ આવેલા સભ્યોમાં પણ પાટીદારોનું પ્રભુત્વ સ્પષ્ટ દેખાઈ આવે છે. જો આગામી નવીન પ્રમુખ માટે પુરુષ સભ્યની પસંદગી કરવામાં આવે તો સંભવત ઉપપ્રમુખ માટે પસંદગીનો કળશ કોઈ મહિલા સદસ્યા ઉપર ઢોળાઈ શકે છે. જો આમ થાય તો રેલવે પૂર્વમાં આવેલા પાલિકાના વોર્ડ નંબર 5ના નગરસેવિકા જલ્પાબેન ધર્મેન્દ્રકુમાર વ્યાસની પસંદગી થઈ શકે તેવી વાત પણ સપાટી ઉપર તરતી જોવા મળી છે. નોંધનીય છે કે જલ્પાબેન વ્યાસ પોતાના મતવિસ્તારમાં તેમજ ભારતીય જનતા પાર્ટી માટે પાયાના કાર્યકર તરીકે ઉભરી આવેલા મહિલા સદસ્યા છે. તેમની પક્ષ પ્રત્યેની વફાદારી અને મતદાર જનતા સાથેની સારા સારી તેમને ઉપપ્રમુખ પદ અપાવી શકે તેવી સંભાવના લોકો જોઈ રહ્યા છે.
