Apna Mijaj News
Breaking Newsઅપરાધ

મહેસાણા પોલીસની આબરૂના ધજ્જિયા ઉડ્યા

આપઘાત કરી લેનાર વ્યક્તિના પરિવારજનો ઉશ્કેરાઈને પીએસઆઇની હાજરીમાં કોન્સ્ટેબલને ફટકાર્યો

કડક કામગીરી માટે જાણીતા એસપી અચલ ત્યાગી પોલીસ કોન્સ્ટેબલ સાથે થયેલા દુર્વ્યવહાર અંગે પગલા ભરશે કે પછી?

મૃતકના કેસનો આરોપી જે જ્ઞાતિનો છે તે જ જ્ઞાતિનો પોલીસ કોન્સ્ટેબલ હોવાથી જ્ઞાતિવાદી ઝેર તો નથી ઓકાયું ને?!

 

સંજય જાની: અપના મિજાજ ન્યુઝ

           મહેસાણા જિલ્લાના ખેરવા ગામે એક યુવકે વ્યાજખોરોના ત્રાસથી આપઘાત કર્યો હોવાની ઘટના બની હતી. જે અંગે મહેસાણા તાલુકા પોલીસ મથકે ગુનો દાખલ કરવામાં આવ્યો જેમાં એક ચોક્કસ જ્ઞાતિના વ્યક્તિને આરોપી તરીકે દર્શાવાયા છે. કહેવાય છે કે મૃતકનું પોસ્ટમોર્ટમ કરવા માટે તેના દેહને મહેસાણાની સિવિલ હોસ્પિટલમાં લાવવામાં આવ્યો હતો. જ્યાં જરૂરી કાનૂની કાર્યવાહી અર્થે મહેસાણા તાલુકા પોલીસ મથકમાં ફરજ બજાવતા કોન્સ્ટેબલ વિમલ દેસાઈ ગયા હતા. એવું પણ કહેવામાં આવી રહ્યું છે કે પોલીસ દ્વારા કરવામાં આવતી કામગીરી શંકાસ્પદ હોવાના આક્ષેપ સાથે મૃતક યુવાનના પરિવારજનો ઉશ્કેરાયા હતા અને કાનૂની કાર્યવાહી કરનાર પોલીસ કોન્સ્ટેબલને ધક્કે ચડાવી તેમને માર પણ મારવામાં આવ્યો હતો. જે ઘટનાને લઈને મહેસાણા પોલીસની આબરૂના ધજ્જિયા ઉડતા જોવા મળ્યા છે. માન્યુંકે કોઈ પરિવાર સાથે બનેલી ઘટના કરુણા ઉપજાવે તેવી છે. પરંતુ બનાવો સંબંધે પોલીસ કોન્સ્ટેબલ તેમના જવાબદાર ફોજદાર સાથે કાનૂની કાર્યવાહી કરવા માટે ગયા હતા. જ્યાં સિવિલ હોસ્પિટલમાં જ એક ટોળું તેમને હાકોટા પડકારા કરતું ઘેરી વળે અને ટપલી દાવ કરી નાખે તેમ છતાં ઉચ્ચ અધિકારીઓ પોતાની એસી ચેમ્બરમાં મોઢું સિવીને બેસી રહે તો પછી નાના કર્મચારીની સલામતીનું શું થશે? તે પ્રશ્ન પણ વિચાર માગી લે છે. અહીં મહત્વની બાબત એ છે કે મહેસાણા જિલ્લામાં ખુદ પોલીસના કર્મચારીઓ જ સલામત નથી તો પછી આમ જનતાની હાલત શું હશે? એ અંગે રાજ્યના ગૃહ મંત્રી પણ વિચાર કરે એ જરૂરી છે.

 

 

સિવિલ હોસ્પિટલમાં મૃતક યુવાનના ઉસકેરાયેલા સંબંધીઓએ ટોળે વળીને પોલીસ કોન્સ્ટેબલ વિમલ દેસાઈને ધક્કે ચડાવી ફટકાર્યા હોવાનું કહેવાય છે. ઉપરાંત આ અંગેનો વિડીયો પણ સોશિયલ મીડિયામાં વાઈરલ થયો છે. જોકે સમગ્ર હકીકત શું હતી? જે વીડિયો સોશિયલ મીડિયામાં વાઈરલ થયો છે તે ખેરવાની ઘટના સંબંધિત છે કે કેમ? તે અંગે સત્ય વિગત લેવા માટે વિભાગીય પોલીસ અધિક્ષક દેસાઈ તેમજ તાલુકા પોલીસ મથકના પીઆઇ આર એસ પરમારનો સંપર્ક સાધ્યો પરંતુ તેઓએ ફોન રિસીવ કર્યો ન હતો. પરંતુ અંતરંગ સૂત્રોના જણાવ્યા પ્રમાણે ખેરવાનો પાટીદાર યુવાન બે દિવસ પૂર્વે ગુમ થયો હતો જેનો મૃતદેહ આજે મળી આવ્યો હતો. તમામ ઘટનાને લઈને પોલીસે કાર્યવાહી હાથ ધરી હતી. મૃત દેને પોસ્ટમોર્ટમ માટે મહેસાણાની સિવિલ હોસ્પિટલમાં લાવવામાં આવ્યો ત્યારે પોલીસ કોન્સ્ટેબલ વિમલ દેસાઈ અને પીએસઆઇ પટેલ જરૂરી કાર્યવાહી માટે સિવિલ હોસ્પિટલ પહોંચ્યા હતા. જ્યાં ઉપસ્થિત મૃતકના સંબંધીઓ પોલીસ ફરિયાદ નોંધવા સહિતની ત્વરિત કામગીરી કરતી ન હોવાની શંકા વ્યક્ત કરી આરોપી વ્યક્તિને બચાવવાના પ્રયાસ થઈ રહ્યા હોવાના પણ આક્ષેપ સાથે તકરાર ઉપર ઉતરી આવ્યા હતા. કહેવાય છે કે ઉસકેરાયેલા ટોળાએ પોલીસ કોન્સ્ટેબલને રોષનું નિશાન બનાવી ધક્કા મૂકી સાથે પણ કરી હતી.
જોકે એક ચર્ચા એવી પણ સામે આવી છે કે મૃતક યુવાનના કેસમાં જે આરોપી છે તે જ જ્ઞાતિનો પોલીસ કોન્સ્ટેબલ હોવાથી કોન્સ્ટેબલ પોલીસ કાર્યવાહીમાં શંકાસ્પદ કામગીરી કરી રહ્યો હોવાની આશંકા સેવીને સમગ્ર ઘટનાને અંજામ આપવામાં આવ્યો છે. જો આ બાબત સત્ય માનવામાં આવે તો અત્યંત શરજનક કહી શકાય કારણ કે છેલ્લા કેટલાક સમયથી જે પ્રમાણે રાજ્યમાં અને દેશમાં જાતિવાદી ઝેર ઓકવામાં આવી રહ્યું છે તે આવનારા ભવિષ્ય માટે ખૂબ જ ઘાતક પુરવાર થઈ શકે તેમ છે.

આ તે કેવા અધિકારીઓ કે ફોન ઉપાડવાની પણ તસ્દી લેતા નથી , જિલ્લા પોલીસ અધિક્ષકની ટીમ સામે સવાલ

       મહેસાણા સિવિલ હોસ્પિટલમાં બનેલી ઘટનાની સચોટ વિગત લેવા માટે ‘અપના મિજાજ ન્યુઝ’ દ્વારા મહેસાણા તાલુકા પોલીસ મથકના પીઆઇનો તેમના મોબાઈલ નંબર ઉપર સંપર્ક સાધ્યો હતો. પરંતુ અધિકારીએ પોતાનો ફોન રિસીવ કર્યો નહોતો. નોંધનીય છે કે જે તે પોલીસ મથક તાબામાં કોઈ ઘટના બને તો તેની જાણકારી પોલીસ મથકના પીઆઇ અને તે વિભાગના નાયબ પોલીસ અધિક્ષકે આપવાની રહે છે. પરંતુ જિલ્લા પોલીસ અધિક્ષક અચલ અત્યાગીની ટીમમાં એવા તૂંડ મિજાજી અધિકારીઓ છે કે જેઓ ફોન ઉપાડવાની તસ્દી પણ લેતાં નથી. આ બધા ઉપરથી એવું માની શકાય કે જો કોઈ નાગરિક સાથે કોઈ અઘટીત ઘટના બને અને તેઓ જે તે પોલીસ મથકના અધિકારીનો સંપર્ક સાધે ને જનતાની રક્ષક કહેવાતી પોલીસના એ અધિકારીઓ પોતાના ફોન ન ઉપાડે તો એ ક્યાંથી જનતાના રક્ષક કહી શકાય?

Related posts

કચ્છના દરિયામાંથી ફરી કરોડોનો “માલ” મળતાં ખળભળાટ

ApnaMijaj

હવેથી વોટ્સએપ નંબર થકી પણ સીધા સીએમનો સંપર્ક કરી શકાશે, ફરીયાદ માટે સીધી સુવિધા

Admin

વિસનગર APMCનો ખેલ, જિલ્લા રજિસ્ટ્રારનો ઠુમકો

ApnaMijaj

Leave a Comment

error: Content is protected !!