•પાલિકા પ્રમુખની આપ ખુદશાહીની નીતિ સામે પક્ષમાં જ વિરોધ ઉઠ્યો હોવાની ચર્ચા
• ચેરમેન પદ આપવામાં પણ વહાલા દવલાની નીતિ, મધ્ય અને પૂર્વ વિસ્તાર સાથે દ્રેષ રખાયો?
• પાલિકાના whatsapp ગ્રુપમાંથી ભાજપના જ અંદાજે 10 સભ્યો રીમુવ થતાં અસંતોષ દેખાયો
• તમામ નિમણૂકો ઉપરથી કરવામાં આવી હોવાનું કહી પ્રમુખે હાથ અધ્ધર કરી દીધા, પણ કંઈક તો ગોલમાલ છે?!
સંજય જાની (અપના મિજાજ ન્યુઝ)
કલોલ નગરપાલિકાની આજે સોમવારે મળેલી ખાસ સાધારણ સભામાં 21 જેટલી કમિટીના નવીન ચેરમેનોની નિમણૂક કરવામાં આવી હતી. જેમાં કહેવાય છે કે પાલિકા પ્રમુખ ઉર્વશીબેન પટેલ અને તેમના ટેકેદારો દ્વારા ચેરમેન પદની લ્હાણી કરવામાં વાહલા દવલાની નીતિ અખત્યાર કરી છે. જાણકાર સૂત્રોએ આપેલી વિગતો મુજબ કહેવાય છે કે કલોલ શહેર ભાજપના પ્રમુખને પણ વિશ્વાસમાં લીધા વગર જિલ્લા કક્ષાએ મોકલવામાં આવેલા સેન્સમાં પૂર્વ આયોજિત કાર્યક્રમ ઘડી કાઢી કયા નગરસેવકને કઈ કમિટીમાં સમાવેશ કરવો તે નક્કી રાખીને ચેરમેન પદની નામાવલી જાહેર કરવામાં આવી છે. જોકે આ બાબત કેટલી સત્ય છે તે તો ખુદ પાલિકા પ્રમુખ અને તેમના ટેકેદારો જ કહી શકે. પરંતુ પાલિકામાં નિમણૂક પામેલા 21 જેટલા વિવિધ કમિટીના ચેરમેન પદને લઈને અસંતોષના ઉકળતા ચરૂએ પાલિકા નગરસેવકોના whatsapp ગ્રુપમાં દેખા દઈને પોતાનો મિજાજ દેખાડ્યો છે.
કલોલ નગરપાલિકામાં કાર્યરત વિવિધ 21 જેટલી કમિટીના ચેરમેનની આજે નિમણૂકો કરવામાં આવી છે. જેમાં પાલિકાના સત્તાધિશો દ્વારા કહેવાય છે કે ચેરમેન પદ આપવામાં અને પાલિકા હસ્તકના વોર્ડમાં પણ પોતાને અને માત્ર પોતાની જ પસંદગીના જ વ્યક્તિનો સમાવેશ કરવામાં આવ્યો હોવાનો ગણગણાટ સત્તાધારી ખુદ ભાજપના જ સભ્યોમાં ઉઠ્યો હોવાની બાબત સપાટી ઉપર આવી છે. જાણકાર સૂત્રોએ આપેલી વિગતો મુજબ પાલિકા પ્રમુખ ઉર્વશીબેન પટેલ વોર્ડ નં. 10માંથી ચૂંટાઈ આવતા સભ્ય છે. તેમની જ વોર્ડ નં.10ની પેનલના અન્ય ત્રણ સભ્યો પૈકી પ્રકાશ વરગડેને બાંધકામ કમિટીનું ચેરમેન પદ, મનુભાઈ ચૌધરીને વોટર વર્કસ કમિટીનું ચેરમેન પદ અને મીનાબેન ભગવાનદાસ જેઠવાણીને કારોબારી સભ્ય તરીકે સમાવેશ કરાવીને સાચવી લીધા હોવાની હવા ઉડી છે. જ્યારે વોર્ડ નં.૯માંથી અગાઉ દિનેશભાઈ પટેલ કારોબારી ચેરમેન હતા. તેમના સ્થાને હવે આ જ વોર્ડમાંથી ભુપેન્દ્ર પટેલને કારોબારી ચેરમેન પદની લાહણી કરવામાં આવી છે. જોકે આ બાબતને લઈને સત્તાધારી પક્ષ ભાજપના જ અમુક સભ્યોમાં નારાજગી પ્રવર્તી રહી હોવાની વાત દબાતા પગલે બહાર આવી છે. પરંતુ નારાજ સભ્યો કંઈ પણ બોલી શકવાની હિંમત ધરાવતા ન હોવાની બાબત પણ એટલી જ દબાઈ રહી છે. જાણકારો તો ત્યાં સુધી કહે છે કે જો પાલિકાનો કોઈ સભ્ય પોતાનો અસંતોષ લઈને ઊભો થાય તો તેઓની રાજકીય કારકિર્દી ખતરામાં પડી શકે તેમ છે.
• ભાજપના અનેક સભ્યો ઉપર શ્રાવણ વદની અંધારી રાતની આકાશી વીજળી પડી હોય તેવી અનુભૂતિ
કલોલ પાલિકામાં કારોબારી સહિત વિવિધ 21 કમિટીની રચનામાં વહાલા દવલાની નીતિ અખત્યાર કરવામાં આવી હોવાની વાત હૈયામાંથી વરાળ સ્વરૂપે ગોટા ઉડાડી રહી છે. જાણકારોના મતે એમ કહેવાય છે કે ભાજપના અનેક સભ્યો પોતાના હૃદયમાં અરમાનો લઈને બેઠા હતા કે તેમને કે તેમના ટેકેદારોને મનવાંચ્છિત કમિટીનું પદ મળશે પરંતુ તેમના એ અરમાનો ઉપર શ્રાવણ વદ આઠમની અંધારી રાતમાં આકાશમાં ચમકતી વીજળી પડી હોય અને વિનાશ વેરી દીધો હોય તેવી સંભવત અનુભૂતિ હાલે તેઓ કરી રહ્યાં છે. જોકે જાણકારો તો એમ પણ કહે છે કે પાલિકાના વર્તમાન સત્તાધિશોએ જે ખેલ રચ્યો છે તે ખેલના અવળા પરિણામ ગણતરીના દિવસો પછી આવનારી વિધાનસભા ચૂંટણીમાં પોતાનો અસલી મિજાજ જરૂર દેખાડશે.
•કારોબારી સિવાયના તમામ ચેરમેનો નખ વગરના વાઘ સમાન બની રહેશે, ખાવા દાળિયાને ચાટવાના હાથ?!
પાલિકામાં કારોબારી સિવાયના તમામ કમિટીના ચેરમેનો કોઈપણ મહત્વના નિર્ણયો કે જે તે કમિટી દ્વારા કરવામાં આવતી કામગીરીના ચુકવણા સંબંધિત બિલ કે મહત્વની બાબતોમાં કોઈ જ સત્તા નહીં ભોગવી શકે તેવો એક ઠરાવ વર્ષ 2010માં જે તે વખતના પ્રમુખ દ્વારા કરવામાં આવ્યો હોવાની ચર્ચા આજે પણ પાલિકાના નગર સેવકોમાં ઉઠી હતી. જે ઠરાવને લઈને એ બાબત પણ સપાટી ઉપર આવી હતી કે વર્ષ 2010માં કરવામાં આવેલો ઠરાવ આજે પણ શિલાલેખની જેમ કાયમ છે. આજે કારોબારી સહિતના જે ચેરમેનોની નિમણૂક કરવામાં આવી છે. તેમાં માત્ર કારોબારીના ચેરમેન જ પોતાની સત્તાનો ઉપયોગ કરી શકશે. બાકીનની 20 જેટલી વિવિધ કમિટીના ચેરમેનો ખાતાકીય રીતે કોઈ જ કામના નથી માત્ર નામના જ ચેરમેન કહેવાશે. કારોબારી ચેરમેન સિવાયના 20 ચેરમેનોની ખાતાકીય કામગીરીની સત્તા માત્ર પ્રમુખ પાસે જ છે. જેથી એમ કહી શકાય કે કારોબારી સિવાયના તમામ ચેરમેનો નખ વગરના વાઘ સમાન બની રહેશે. તદુપરાંત કહેવાય છે કે જો વર્ષ 2010થી અત્યાર સુધીની કારોબારી સિવાયની વિવિધ કમિટીની કામગીરીના વહિવટની તપાસ કરાવાય તો મોટા પ્રમાણમાં આચરવામાં આવેલી ગેરરીતી પણ પકડી શકાય તેમ છે. પરંતુ આ બધું કરવા માટે નિષ્ઠાવાન, નિર્ભિક અને ઈમાનદાર પાલિકાના સભ્ય હોવું જરૂરી બની રહે છે.
•ભાજપના 33માંથી 8થી 10 નગરસેવકોની whatsapp ગ્રુપમાંથી વિકેટો ખરી પડી
પાલિકાના સભા હોલમાં આજે બપોરે 2:30 વાગ્યાના અરસામાં યોજાયેલી ખાસ સાધારણ સભામાં 21 જેટલી વિવિધ કમિટીના ચેરમેનોની વરણી કરવામાં આવી તેમાં રાજનીતિના એક્કાઓ ખંધુ રાજકારણ રમીને બાજી મારી ગયા હોવાની અનુભૂતિ ભાજપના જ અમુક નગરસેવકોના અંતર આત્માને ધુણાવી ગઈ છે. સંભવત અનેક નગરસેવકો કમિટીના ચેરમેન પદ મેળવવા ઇચ્છુક હતા. પરંતુ કહેવાય છે કે રમતો રમવામાં માહિર ખેલૈયાઓ વહાણે ચડાવીને પાટિયા ખેંચી ગયા ને કેટલાય નગર સેવકો મધદરિયે આવીને હાલક ડોલક થયા છે. ચેરમેન પદ નહીં મળવાનો તેમજ જેને પણ મળ્યું છે તેમાં અસંતોષનો રાતોચોળ જ્વાળારસ ટપકતો સ્પષ્ટ જોવા મળી રહ્યો હોવાનું જાણકાર સૂત્રો કહી રહ્યા છે. પાલિકામાં ચૂંટાયેલા ભાજપના 33 સભ્યોના whatsapp ગ્રુપમાંથી ચેરમેન પદની લહાણી પછી સભ્યોની એક પછી એક એમ અંદાજે ૧૦ જેટલી વિકેટો ખરી પડી છે. જે કદાચિત સંકેત આપે છે કે પાલિકાના પ્રમુખ અને મળતીયાઓ હવે આવનારા દિવસોમાં તમે પણ જોઈ લેજો.
