•પાલિકા વિસ્તારમાં બેનરો-હોર્ડિંગ્સ લગાવવાનો કોન્ટ્રાક્ટ અપાયો છે કે પછી…?!
• પાલિકા પ્રમુખની મહેરબાનીથી આર્થિક લાભ લેવાના બદલે લહાણી કરાઈ?
•ઠેર-ઠેર લાગેલા હોર્ડિંગ્સ ભારે પવનમાં ઉડી કોઈના માથે પડશે તો જવાબદારી કોની?
સંજય જાની (અપના મિજાજ)
કલોલ પાલિકા વિસ્તારમાં આવેલા વીજ પોલ તેમજ અન્ય સરકારી, બિન-સરકારી જગ્યાઓ ઉપર શાળાઓ તેમજ ટ્યુશન ક્લાસીસના સંચાલકો દ્વારા તોતિંગ હોર્ડિંગ્સ તાણી દેવામાં આવ્યા છે જેને લઇને જનતામાં અનેક જાતના પ્રશ્નો ઉપસ્થિત થયા છે. પાલિકા દ્વારા કહેવાય છે કે હોર્ડિંગ્સ લગાવવા માટેનો કોન્ટ્રાક્ટ આપવામાં આવ્યો છે. જેમાં માત્ર ૨૦ જેટલી પાર્ટીઓએ રસ દાખવીને પોતાના હોર્ડિંગસ પાલિકાની નિયત રકમ ભરીને લગાવ્યા છે. પરંતુ છેલ્લા બે-ત્રણ દિવસથી પાલિકા વિસ્તારમાં ગેરકાયદે શાળા અને ટ્યુશન ક્લાસીસમાં પ્રવેશ માટેની જાહેરાત કરતા હોર્ડિંગ્સ ઠેર ઠેર લગાવી દેવામાં આવ્યા છે. જે હોર્ડિંગ્સ પાલિકા પ્રમુખની લહાણી છે કે પછી પાલિકાની તિજોરી સદ્ધર કરવા માટેનો પ્રયાસ છે ? તેની કોઈ જ જાણકારી પાલિકાના જવાબદારો આપી રહ્યા નથી. જેથી શહેરમાં લાગેલા હોર્ડિંગ્સ ગેરકાયદે હોય તેમ માની લેવું જરાય અનુચિત ન હોવાનું લોકો કહી રહ્યા છે.
ઉનાળુ વેકેશન પૂર્ણ થવાના આરે આવીને ઊભું છે. આવનારા દિવસોમાં શાળા, કોલેજ અને ટ્યુશન ક્લાસીસોમાં વિદ્યાર્થીઓનો ધમધમાટ જોવા મળશે. વિદ્યાર્થીઓ પોતાની શાળા અને ટ્યુશન ક્લાસીસ તરફ આકર્ષાય તે માટે શાળા, ટ્યુશન ક્લાસીસના સંચાલકો દ્વારા કલોલ શહેરના વિવિધ વિસ્તારોના મુખ્ય માર્ગો પર આવેલા વીજ પોલ તેમજ અન્ય જગ્યાઓ ઉપર પોતાની શાળા અને ટ્યુશન ક્લાસીસની જાહેરાત કરતા તોતિંગ હોર્ડિંગ તાણી બાંધ્યા છે. જો કે જાણકાર સૂત્રોએ આ માટે પાલિકાના સત્તાધીશોએ કોઈ જ મંજૂરી આપી નથી પરંતુ સત્તા સ્થાને બેઠેલા અમુક લોકોએ ‘સંબંધો’ સાચવવા માટે આવી મંજૂરી આપી દીધી હોય તેની સંભાવના વ્યક્ત કરી છે. કહેવાય છે કે પાલિકા વિસ્તારમાં જાહેરાત માટેના હોર્ડિંગ્સ લગાવવા માટે પાલિકા દ્વારા કોન્ટ્રાક્ટ આપવામાં આવતો હોય છે. શહેરમાં લગાવવામાં આવતાં હોર્ડિંગ્સમાંથી થતી આવક પાલિકાની તિજોરીમાં જમા થાય છે. પરંતુ અહીં તાજેતરમાં લાગેલા હોર્ડિંગ્સ માટે જાહેરાત કરનારા શાળા તેમજ ટ્યુશન ક્લાસીસના સંચાલકો પાસેથી ‘મીઠું મોં’ લઈ પાલિકાને આર્થિક નુકસાન કરી લહાણી કરવામાં આવી હોય તેવા આક્ષેપો પણ થઈ રહ્યા છે.
•વાયરા અને વાવાઝોડામાં હોર્ડિંગ્સ થાંભલેથી ઉડી કોઈના માથે પડશે તો જવાબદારી કોની?
શહેરમાં પાલિકા વિસ્તારમાં આવેલા થાંભલાઓ ઉપર કે અન્ય જગ્યાએ સંભવત ગેરકાયદે લગાવવામાં આવેલા શાળા અને ટ્યુશન ક્લાસીસની જાહેરાત કરતાં તોતિંગ હોર્ડિંગ્સ વર્તમાન સમયમાં વાતા વાયરામાં કે આવનારા દિવસોમાં કદાચિત વાવાઝોડામાં થાંભલા ઉપરથી ઉડીને કોઇ રાહદારી કે વાહનચાલકો ઉપર પડે અને તેમને ઈજા કરશે અથવા તો જાનહાનિ સર્જશે તો જવાબદારી કોની? તેવા પ્રશ્નો પણ શહેરીજનોમાં ઉઠવા પામ્યા છે.
•હોર્ડિંગ્સ લગાવવાની મંજૂરી કોણે આપી? તેનો જવાબ પણ પાલિકાના સત્તાધીશો પાસે નથી?!
શહેરમાં ઠેર-ઠેર લાગેલા શાળા અને ટ્યુશન ક્લાસીસના પ્રવેશ અંગેની જાહેરાત કરતા હોર્ડિંગ્સ તાણી બાંધવા માટે કોણે મંજૂરી આપી છે? તેવો પ્રશ્ન અહીં ઉપસ્થિત થયો છે. બીજી તરફ આ પ્રશ્ન અંગે પાલિકાના કોઈ જ સત્તાધીશો ફોડ પાડતા ન હોવાની બાબત પણ સપાટી ઉપર આવી છે. જો પાલિકાના સત્તાધીશોએ હોર્ડિંગ્સ તાણી બાંધવા માટે મંજૂરી નથી આપી તો તેઓએ તાત્કાલિક આવા હોર્ડિંગ્સ ઉતારી લેવા સંચાલકોને કહેવું પડશે. અથવા તો આ માટે પાલિકાની તિજોરી ભરવા નિયત રકમ તેમની પાસેથી લઈ કોઈ લાભની કામગીરી માટે તેનો ઉપયોગ કરવો જ રહ્યો. તેવું નગરજનો માની રહ્યા છે. જોકે એક આક્ષેપ એવો પણ છે કે પાલિકાના સત્તાધીશોએ શાળા તેમજ ટ્યુશન ક્લાસીસના સંચાલકો સાથે ‘ભાઈબંધી’ નિભાવી લીધી છે. જો આક્ષેપ સાચા હોય તો વિપક્ષે પણ આ બાબતે પોતાનો વિરોધ દર્શાવો જોઈએ તેવો મત પણ નગરજનો આપી રહ્યા છે.
