Apna Mijaj News
જનતાનો અવાજ

મહેસાણા જિલ્લા કલેકટરને કોઈ સમાચાર પહોંચાડજો કે કોરોનાની ગાઈડલાઈન જિલ્લા તિજોરી કચેરીમાં પહોંચી નથી ! પેન્શનર વિભાગમાં લાલીયાવાડી

•કચેરીમાં ફરજ બજાવતા કર્મચારીઓ મોઢે માસ્ક બાંધવામાં શરમ અનુભવતા હોય તેવા દ્રશ્યો
•સરકારી કચેરીમાં પ્રવેશ આપવો હોય તો વેકસીન લીધાના પુરાવા આપવા પડે, માસ્ક પહેરવું ફરજિયાત છે
અમે તો આમ જ રહીશું જે કરવું હોય તે કરી લો !
•અહીંની કચેરીના બાબુઓ કચેરીમાં આવતા અરજદારો અને વડીલ પેન્શનરો માટે જોખમી સાબિત થશે
મહેસાણા: (અપના મિજાજ નેટવર્ક)
રાજ્યભરમાં કોરોના સહિતની બીમારીએ માથું ઊંચક્યું છે અને કોરોનાની ત્રીજી લહેર જનમાનસમાં ભયનો માહોલ ઊભી કરી રહી છે. જેને લઇને રાજ્ય સરકારે અને તેમના સંબંધિત વિભાગે કરોડો રૂપિયાના ખર્ચે આયોજન કરેલા તમામ ઉત્સવોને રદ કરી દીધા છે. રાજ્યના મુખ્યપ્રધાન પણ માને છે કે વાઇબ્રન્ટ ગુજરાત સમિટ સહિતના કાર્યક્રમોમાં મોટા પ્રમાણમાં ભીડ એકત્રિત થશે તો ગુજરાતની જનતાને કોરોના મહામારીમાંથી ઉગારવી મુશ્કેલ બની શકે તેમ છે. જેને લઇને અનેક મોટા નિર્ણયો કરી લોકો કોરોના મહામારીનો ભોગ ન બને તે માટે સુનિયોજિત આયોજનો ઘડી કાઢવામાં આવ્યા છે. એટલું જ નહીં કોરોના અને એનિક્રોન ચેપથી લોકો બચે તે માટે કોરોના અંતર્ગત નવા નિયમો પણ જાહેર કરી દેવામાં આવ્યા છે. પરંતુ અહીં મહેસાણાની જિલ્લા તિજોરી કચેરીમાં સામે આવેલા દ્રશ્યોથી એવું જરૂર લાગી શકે કે સરકારના કોરોના રક્ષિત નિયમો આ કચેરીમાં કામ કરતા સરકારી બાબુઓને લાગુ નથી પડતા અથવા તો તેઓને મોઢે માસ્ક બાંધવામાં લાજ આવી રહી છે.
બીના માસ્ક વાલા મુખડા લેકે ફીરો ના… બાજાર મેં…
             મહેસાણા જિલ્લા કલેકટર કચેરીના પ્રાંગણમાં આવેલી જિલ્લા તિજોરી કચેરીના વિવિધ વિભાગોમાં ફરજ બજાવતા અધિકારીઓ અને કર્મચારીઓની કોરોના guideline મુદ્દે લાલીયાવાડી જોવા મળી હતી. અહીં જાણે કે  સાહેબોનું સ્વરાજ ચાલતું હોય તેમ કોરોના ગાઇડ લાઇનને કચરાપેટીમાં નાખીને અહીંના સરકારી બાબુઓ પોતાની ફરજ બજાવી રહ્યા છે. સરકાર અને તેમના વહીવટી તંત્ર દ્વારા સરકારી કચેરીઓમાં પ્રવેશ અંતર્ગત કોરોના ની રસી લીધેલી હોવી જોઈએ અને માસ્ક વગર તો કોઈને પણ પ્રવેશ ન આપવો તેવો આકરો નિયમ જાહેર કરવામાં આવ્યો છે. જોકે આ તમામ નિયમો આમ જનતાને જ લાગુ પડતા હોવાની વધુ એક વખત સાબિતી અહીંની જિલ્લા તિજોરી કચેરીમાં કામ કરતા અધિકારીઓ અને કર્મચારીઓએ આપી દીધી છે. મોઢા પર માસ્ક લગાવ્યા વગર કામ કરતા અહીંના સરકારી બાબુઓ એ ભૂલી ગયા છે કે કચેરીમાં કામ અર્થે આવતાં અરજદારો અને ખાસ કરીને પેન્શન બાબતે આવતા વડીલો આપનામાંથી જ કોઈ કોરોના જેવા ગંભીર રોગનો ચેપ લઈ ઘરે જશે અને તેમનો જીવ જોખમમાં મુકાશે તેની જવાબદારી કોણ લેશે?
          જિલ્લા તિજોરી કચેરીના અધિકારીઓ અને કર્મચારીઓ માસ્ક શા માટે નથી બાંધતા તે અંગે તેમની પાસેથી મહેસાણા પાલિકાના પૂર્વ પ્રમુખ અને રાજકીય અગ્રણી જયદીપસિંહ ડાભીએ જવાબ માંગતા અહીંના સાહેબો ‘લાજવાને બદલે તેઓ સામે ગાજવા લાગ્યા હતાં’ અને કહી દીધું હતું કે અમે માસ્ક નહીં પહેરીએ તમારે જે કરવું હોય તે કરી લો. હવે પ્રશ્ન અહીં એ થાય છે કે રાજ્યના મુખ્યપ્રધાન અને આરોગ્ય મંત્રી કોરોનાથી બચવા અંગે લોકોને ગમે એટલા મસ્ત મોટા ભાષણો આપે કે પછી જનજાગૃતિ માટે લાખો કરોડો રૂપિયાનો ખર્ચ કરે પરંતુ જ્યાં સુધી તેમની જ સરકારના આવા નોકરો બેદરકારી દાખવતા રહેશે ત્યાં સુધી તમે જે કંઈ પણ જનતા માટે કરશો તે બધું જ પાણીમાં પડ્યું હોય તેવી સ્થિતિ નિર્માણ થતી જોવા મળશે. જો સરકારે આવી સ્થિતિમાં ના આવવું હોય તો પ્રથમ તો પોતાના સરકારી નોકરશાહોને સરકારી નિયમોથી અત્યંત કડક રીતે બાંધી નિયમ પાલન કરાવવા આગળ આવવું પડશે. જો આમ નહીં થાય તો આમ જનતા પણ સરકારી નોકરશાહોને તમે પહેલા નીતિ-નિયમ પારો પછી અમને શીખવાડજો તેવા શબ્દો ઉચ્ચારતા વાર નહીં કરે અને આ બધું ભૂતકાળમાં થઇ ચૂક્યું છે. ભવિષ્યમાં ન થાય તે માટે કાર્યવાહી કરવી અહીં જરૂરી બની રહે છે.

Related posts

ઊંઝા વિધાનસભા માટે ભાજપ આ વ્યક્તિત્વને ઓળખે!

ApnaMijaj

બગોદરા નજીક કરોડોના ખર્ચે બનેલા માર્ગ પરથી ઉખડેલા ભ્રષ્ટાચારના પોપડા દબાવવા ‘ખુરાના’એ રોડ ‘ખોતર્યો’ !

ApnaMijaj

મહેસાણા સિવિલ ભલે નવી બને પણ ખખડી ગયેલો સ્ટાફ પણ બદલાવ જો…

ApnaMijaj

Leave a Comment

error: Content is protected !!